Bash bet>>Qanun tori>>Qanun sawatliri
Toxtitip qoyushning türliri we perqi
Tehrir:Gülbehrem muxtar     Menbesi:Junggo uyghurche radiyo tori     Yollan'ghan waqit: 2014-09-16

 

"toxtitip qoyush" dégen söz qanundiki belgilimige xilapliq qilghuchini qanun boyiche qamap qoyup, jismaniy erkinliktin waqtinche mehrum qilidighan tedbirge qaritilghan. Dölitimizde memuriy toxtitip qoyush, edliye jehettin toxtitip qoyush, toxtitip qoyup tekshürüsh, jinayi ishlar boyiche toxtitip qoyushtin ibaret töt xil toxtitip qoyush usuli bar.

memuriy toxtitip qoyush: jamaet xewpsizliki orgini amanliq bashqurushqa xilapliq qilghuchini jismaniy erkinliktin waqtinche mehrum qilidighan amanliq bashqurush jazasini körsitidu.

edliye jehettin toxtitip qoyush: xelq sot mehkimisi heq telep dewasi, memuriy dewa we jinayi ishlar dewasigha tosqunluq qilghuchigha qanun boyiche qollanghan, uni jismaniy erkinliktin mehrum qilidighan edliyelik jaza.

toxtitip qoyup tekshürüsh: jamaet xewpsizliki orginining chégradin qanunsiz kirgen, qanunsiz turghan chet elliklerni jismaniy jehettin waqtinche mehrum qilip, tekshürüshke qolayliq yaritishtiki memuriy mejburlash tedbiridur.

jinayi ishlar boyiche toxtitip qoyush: jamaet xewpsizliki orgini yaki xelq teptish mehkimisi jiddiy ehwalda, neq jinayetchi yaki zor jinayet gumandarlirigha qanun boyiche qollanghan, jismaniy erkinliktin waqtinche mehrum qilidighan jinayi ishlar boyiche mejburlash tedbiridur.

ularning perqi:

1 . Xaraktéri oxshimaydu. Memuriy toxtitip qoyush amanliq bashqurushqa xilapliq qilghuchigha bérilidighan memuriy jaza bolup, memuriy qanun katégoriyesige kiridu. Edliye jehettin toxtitip qoyush bir xil edliyelik jaza bolup, u dewa qanuni katégoriyesige kiridu, dewa ishlirigha dair qanunlar, jümlidin jinayi ishlar dewa qanuni we memuriy dewa qanuni, heq telep dewa qanuni uning qanuniy asasidur. Toxtitip qoyup tekshürüsh bir xil mejburlash tedbiri bolup, jaza hésablanmaydu. U memuriy qanun katégoriyesige kiridu. Chet elliklerning chégradin kirish-chiqishni bashqurush qanuni uning qanuniy asasi qilinidu. Jinayi ishlar boyiche toxtitip qoyush jinayi ishlar jehettiki bir xil memuriy mejburlash tedbiri bolup, jaza hésablanmaydu, u jinayi ishlar katégoriyesige kiridu, jinayi ishlar dewa qanuni uning qanuniy asasi qilinidu.
2. Tetbiqlinidighan obyéktlar oxshimaydu. Memuriy toxtitip qoyush jamaet tertipini qalaymiqanlashturghan,jamaet xewpsizlikige dexli yetküzgen, jismaniy hoquq we mal-mülük hoquqigha chéqilghan, jemiyet bashqurushqa dexli yetküzgenlerdin qilmishi éghirraq bolghan lékin jinayi jazagha toshmaydighanlargha tetbiqlinidu. Edliye jehettin toxtitip qoyush: sot mehkimisi jinayi ishlar délolirini, heq telep délolirini, memuriy délolarni sot qilish jeryanida (edliye paaliyiti) dewa ishtirakchiliri (edliye xadimliri, dewagha qatnashquchilar, guwahchi, terjiman, bahalighuchi) yaki sirttin qatniship anglighuchilardin sot tertipige xilapliq qilip qilmishi éghir bolghanlargha tetbiqlinidu. Toxtitip qoyup tekshürüsh: chégradin qanunsiz kirgen, qanunsiz turghan chet elliklerge tetbiqlinidu. Jinayi ishlar boyiche toxtitip qoyush bolsa neq jinayetchiler yaki zor jinayet gumandarlirigha tetbiqlinidu.

3. Tekshürüp testiqlaydighan organ oxshimaydu. Memuriy toxtitip qoyushni jamaet xewpsizliki orginining mesuli tekshürüp testiqlaydu. Edliye jehettin toxtitip qoyushni xelq sot mehkimisining bashliqi testiqlaydu. Toxtitip qoyup tekshürüshni jamaet xewpsizliki orginining mesuli tekshürüp testiqlaydu. Jinayi ishlar boyiche toxtitip qoyushni jamaet xewpsizliki orginining mesuli tekshürüp testiqlaydu yaki xelq teptish mehkimisining mesuli tekshürüp testiqlaydu.

4. Qamash sürüki oxshimaydu. Memuriy toxtitip qoyush bilen edliye jehettin toxtitip qoyushning sürüki bir kündin yuqiri 15 kündin töwen bolidu. Buning ichide memuriy toxtitip qoyushni birleshtürüp ijra qilish sürüki 20 kün bolidu. Toxtitip qoyup tekshürüshning sürüki adette bir aydin töwen bolidu. Alahide ehwalda bir ay uzartishqa bolidu. Jinayi ishlar boyiche toxtitip qoyushning sürüki adette üch kün bolidu, alahide ehwalda yette künigiche uzartishqa bolidu. Éqip yürüp délo sadir qilghan, köp qétim délo sadir qilghan, shérikliship délo sadir qilghan zor jinayet gumandarlirining sürükini 30 künigiche uzartishqa bolidu.

 

Aldinqisi
Kéyinkisi
Munasiwetlik xewerler
yéngi xewerler Yene
süretlik xewer Yene
süretlik tenterbiye xewerliri
pen-téxnika uchurliri Yene
ghelite ishlar Yene
kocha parangliri Yene
saghlamliq Yene