26-مارت، مۇخبىر شىنجاڭ ئۇيغۇر ئاپتونوم رايونلۇق داۋالىنىش كاپالىتى ئىدارىسىدىن مۇنۇلارنى ئىگىلىدى: ئاپتونوم رايون يېڭىدىن 125 تۈرلۈك داۋالاش تۈرىنى ئاساسىي داۋالىنىش سۇغۇرتىسى فوندىدىن چىقىم قىلىش دائىرىسىگە كىرگۈزگەن بولۇپ، يېقىندا رەسمىي ئەمەلىيلەشتۈرۈلۈپ ئىجرا قىلىندى. بۇنىڭ ئىچىدە توققۇز تۈرلۈك داۋالاش خاراكتېرلىك كۆپىيىشكە ياردەم بېرىش تېخنىكا تۈرى بار، بۇ، ئاپتونوم رايوننىڭ داۋالاش خاراكتېرلىك كۆپىيىشكە ياردەم بېرىش تېخنىكا تۈرىنى تۇنجى قېتىم داۋالىنىش سۇغۇرتىسىدىن ئاتچوت قىلىش دائىرىسىگە كىرگۈزۈشى ئىكەن. 

  يېقىنقى يىللاردىن بۇيان، دۆلەتنىڭ ئالاقىدار تارماقلىرى كۆپىيىشكە ياردەم بېرىش تۈرىدىكى داۋالاش مۇلازىمىتى تۈرىنى تۇرغۇزۇش ۋە داۋالىنىش سۇغۇرتىسىدىن چىقىم قىلىشنى باشقۇرۇشقا يۈكسەك ئەھمىيەت بەردى، دۆلەتلىك سەھىيە-ساغلاملىق كومىتېتى قاتارلىق 17 تارماقنىڭ «ئاكتىپ پەرزەنتلىك بولۇشنى قوللاش تەدبىرلىرىنى يەنىمۇ مۇكەممەللەشتۈرۈش ۋە ئەمەلىيلەشتۈرۈش توغرىسىدىكى يېتەكچى پىكىر» قاتارلىق ھۆججەتلىرىنىڭ تەلىپىگە ئاساسەن، دۆلەت داۋالىنىش كاپالىتى ئىدارىسى يەرلىكنىڭ داۋالىنىش سۇغۇرتىسى(تۇغۇت سۇغۇرتىسىنىمۇ ئۆز ئىچىگە ئالىدۇ) فوندىنىڭ بەرداشلىق بېرىش ئىقتىدارى، ئالاقىدار تېخنىكىلارنىڭ قېلىپلىشىشى قاتارلىق ئامىللارنى ئۇنىۋېرسال ئويلىشىپ، كۆپىيىشكە ياردەم بېرىش تۈرىدىكى داۋالاش مۇلازىمىتى تۈرىنى تۇرغۇزۇش ۋە داۋالىنىش سۇغۇرتىسىدىن چىقىم قىلىشنى باشقۇرۇشنى يەنىمۇ مۇكەممەللەشتۈرۈشىگە يېتەكچىلىك قىلدى.

  شىنجاڭ ئۇيغۇر ئاپتونوم رايونى كۆپىيىشكە ياردەم بېرىش تېخنىكىسىنى قانات يايدۇرغان داۋالاش ئاپپاراتلىرىنىڭ ئەھۋالىنى تەلتۆكۈس تەكشۈرۈپ، ئاغرىقلارنىڭ ئېھتىياجى ۋە شۇ جاينىڭ داۋالاش تېخنىكا سەۋىيەسىگە بىرلەشتۈرۈپ، مۇتەخەسسىسلەرنىڭ دەلىللىشى ئارقىلىق، ئەڭ ئاخىرىدا توققۇز تۈرلۈك داۋالاش خاراكتېرلىك كۆپىيىشكە ياردەم بېرىش تېخنىكىسى تۈرىنى داۋالىنىش سۇغۇرتىسىغا كىرگۈزۈشنى بېكىتتى، بۇ B چاۋ ئارقىلىق تۇخۇم ئېلىش تېخنىكىسى، ئىسپېرما DNAسىنىڭ مۇكەممەللىكىنى تەكشۈرۈش قاتارلىقلارنى ئۆز ئىچىگە ئالىدۇ، بۇ تۈرلەر كۆپىيىشكە ياردەم بېرىش سالاھىيىتىنى ھازىرلىغان داۋالاش ئاپپاراتلىرى كۆپىيىشكە ياردەم بېرىپ داۋالاشتا قوللانغاندا چىقىم قىلىش بىلەن چەكلىنىدۇ، شۇنداقلا داۋالاش تۈرلىرىنى قىسمەن چىقىم قىلىش بويىچە باشقۇرۇلىدۇ. سۇغۇرتىغا قاتناشقانلار ئامبۇلاتورىيە تەمىناتىدىن بەھرىمەن بولغاندا، فوندنىڭ دەسلەپكى چىقىم ئۆلچىمى تەسىس قىلىنمايدۇ، ئىشچى- خىزمەتچىلەر ئاساسىي داۋالىنىش سۇغۇرتىسى، شەھەر- يېزا ئاھالىلىرىنىڭ ئاساسىي داۋالىنىش سۇغۇرتىسىدىن ئاتچوت قىلىش نىسبىتى ئايرىم- ئايرىم ھالدا %80، %70 بولۇپ، سۇغۇرتىغا قاتناشقانلارنىڭ يىللىق فوندىنىڭ ئەڭ يۇقىرى چىقىم قىلىش چېكىگە كىرگۈزۈلىدۇ. 

  ئاپتونوم رايونلۇق داۋالىنىش كاپالىتى ئىدارىسى تېببىي دورا مۇلازىمىتىنى باشقۇرۇش باشقارمىسىنىڭ مەسئۇلى مۇنداق تونۇشتۇردى: ئۈچ دەرىجىلىك داۋالاش ئاپپاراتلىرىنىڭ بىر قېتىم B چاۋ ئاپپاراتى ئارقىلىق تۇخۇم ئېلىش ئوپېراتسىيەسىنى قىلىشىنى مىسالغا ئالساق، خىراجىتى 1584 يۈەن، ئەگەر ئىشچى-خىزمەتچىلەر داۋالىنىش سۇغۇرتىسىدىن %80لىك نىسبەت بويىچە ئاتچوت قىلىنسا، شەخسلەر پەقەت 316.8 يۈەن تۆلىسىلا بولىدۇ. 

بۇ قېتىم يېڭىدىن داۋالىنىش سۇغۇرتىسىغا يەنە 116 تۈرلۈك ئادەتتىكى دىياگنوز قويۇش ۋە داۋالاش تۈرى كىرگۈزۈلگەن بولۇپ، ئىچكى-تاشقى كېسەللىكلەر بۆلۈمى، تۇغۇت بۆلۈمى، بالىلار بۆلۈمى، جۇڭيى تېبابىتى، سالامەتلىكنى ئەسلىگە كەلتۈرۈش، سۈرەتكە ئېلىش، تەكشۈرۈش قاتارلىق داۋالاش ساھەلىرىگە چېتىلىدۇ، مەسىلەن، ئازوت (Ⅱ) ئوكسىدى سۈمۈرتۈپ داۋالاش، يېڭى تۇغۇلغان بوۋاقلارنى ئارىلاشما ئوكسىگېن بىلەن داۋالاش، بالىلار كېسەللىكلىرىنى ئۇۋۇلاپ داۋالاش قاتارلىق تۈرلەر بار.

    بۇ سىياسەت سۇغۇرتىغا قاتناشقانلارنىڭ ئاساسىي داۋالىنىشىنى كاپالەتلەندۈرۈش سەۋىيەسىنى يەنىمۇ ئۆستۈرۈپ، شەخسلەرنىڭ داۋالىنىش خىراجىتى يۈكىنى يېنىكلىتىدۇ، فوندنىڭ ئىشلىتىلىش ئەھۋالى بويىچە تەخمىنىي ھېسابلىغاندا، ھەر يىلى سۇغۇرتىغا قاتناشقان ئاممىنىڭ داۋالىنىش خىراجىتى تەخمىنەن 600 مىليون يۈەن تۆۋەنلىشى مۇمكىن.