Bash bet>>Xewer Merkizi>>Süretlik Xewerler

Merkez wekiller ömikidikiler her qaysi wilayet, oblast, sheherlerge bérip hal soridi

Tehrir:Osmanjan yüsüp     Menbesi:Shinjang géziti     Yollan'ghan waqit: 2015-09-29

 

j k p merkiziy komitéti siyasiy biyurosi daimiy komitétining ezasi, memliketlik siyasiy kéngeshning reisi, merkez wekiller ömikining bashliqi yü jéngshéng 26 – séntebir merkez wekiller ömikining qismen ezalirini bashlap qeshqerge bérip, her millet kadirlar we ammini yoqlidi. Memliketlik siyasiy kéngeshning muawin reisi, dölet milletler ishliri komitétining mudiri, merkez wekiller ömikining muawin bashliqi wang jéngwéy birge bardi, j k p merkiziy komitéti siyasiy biyurosining ezasi, aptonom rayonluq partkomning shujisi jang chünshyen hemrah boldi.

qurban héyt mezgili bolghachqa, qedimiy sheher qeshqerning hemmila yéride bayramliq xushal keypiyat ewj alghanidi. Réstoranlarda toylar ötküzülüwatqan bolup, méhmanlar ussulgha chüshkenidi; Awam chong sehniside mol mezmundiki nomurlar orunlinip, nurghun sheher ahalisini jelp qilghanidi, uyghur qiz – chokanlar etles köngleklirini kiyiship, qollirida sangza we pishuruqlarni kötürginiche uruq – tughqan, dostlirining öyige héytlap mangghanidi... Köpchilik aptonom rayonimiz qurulghanliqining 60 yilliqini oxshashmighan usulda tebriklep, qurban héyt, tawuz chaghini, dölet bayrimini xushal qarshi éliwatqanidi, hemmila yerde inaqliq, ittipaqliq, xatirjemlik eks etkenidi.

yü jéngshéng 26 – séntebir chüshtin burun ilgiri – kéyin bolup qeshqer wilayitidiki alaqidar mesul yoldashlar we péshqedem yoldashlar, ilghar nemunichi shexsler, wetenperwer diniy zatlar, shinjanggha yardem bériwatqan kadirlar wekilliri bilen körüshti hem qeshqer wilayitidiki yéza – bazarlarda xizmet qiliwatqan ichkiri ölkidiki aliy mekteplerni pütküzgenler wekilliri bilen körüshüp, köpchilik bilen semimiy qol éliship körüshüp, xatire süretke chüshti.

yü jéngshéng arqidin qeshqer wilayitining aptonom rayon qurulghanliqining 60 yilliqini tebriklesh söhbet yighinigha qatnashti.

söhbet yighinida, qeshqer wilayetlik j x idarisi téxnikiliq tehqiqlesh tarmaq etritining siyasiy komissari iminjan turaq, qeshqer wilayetlik sehiye mektipining oqutquchisi aniqiz osman, qeshqer kona sheher nahiyesi toqquzaq baziri saybagh mehellisining kadiri süy jyushyu qatarliq asasiy qatlamning wekilliri söz qildi. Köpchilik baliliq chaghliridiki arzulirini sözlep, partiyelik kadirlarning mesuliyiti üstide toxtilip, özlirining ösüp yétilish jeryanidiki özgirishlerni, aptonom rayon qurulghanliqining 60 yilliqi, bolupmu merkezning shinjang xizmiti söhbet yighini échilghandin buyan jenubiy shinjangda yüz bergen zor tereqqiyat we özgirishlerni sözlep ötti, ularning semimiy hem tesirlik sözliridin her millet kadirlar we ammining partiye merkiziy komitéti we memliket xelqige bolghan minnetdarliq héssiyati, 60 yildin buyan shinjangda yüz bergen alemshumul özgirishlerdin xushal bolush, pexirlinish, shuningdek güzel shinjang qurup chiqish qetiy iradisi ipadilendi.

yü jéngshéng köpchilikning sözini estayidil anglighandin kéyin mundaq dédi: partiye merkiziy komitéti, gowuyüen ezeldin shinjang xizmitige yüksek köngül bölüp keldi. Merkezning 2 – qétimliq shinjang xizmiti söhbet yighini ijtimaiy muqimliq we ebediy eminlikni shinjang xizmitining bash nishani qilip éniq békitti. Shinjang uyghur aptonom rayoni qurulghan 60 yildin buyan, qeshqerning iqtisadiy, ijtimaiy ishlirida zor özgirishler boldi. Qeshqer ijtimaiy muqimliq we ebediy eminlikni barliq xizmetlerning közlesh nuqtisi we küchesh nuqtisi qilip, yuqiri bésimliq qaqshatquch zerbe bérish halitini bashtin – axir saqlap, xelq turmushining xatirjemlikige qetiy kapaletlik qilishi; Iqtisadiy, ijtimaiy ishlarning téximu yaxshi hem téz tereqqiy qilishini tiriship ilgiri sürüp, emgek köjümleshken kesiplerni zor küch bilen tereqqiy qildurup, ishqa orunlashturush nisbitini tiriship ashurushi, elrayini tiriship mayil qilishi we mujessemlishi; Xelq turmushigha dawamliq kapaletlik qilip we uni yaxshilap, ammining janijan menpeitige munasiwetlik muhim mesililerni qetiy niyetke kélip hel qilishi; Milletler ittipaqliqini mustehkemlep we kücheytip, din xizmitini yenimu yaxshi ishlishi; Kadirlar qoshuni qurulushini kücheytip, kadirlar istilini yaxshilishi kérek.

merkez wekiller ömikidikiler chüshtin kéyin, qeshqer shehiridiki héytgah jamesige keldi. Héytgah jamesi 1442 – yili sélinghan bolup, shinjangdiki kölimi eng chong meschit hésablinidu. Yü jéngshéng héytgah jamesige kirip, sekkiz burjeklik ötüshme zal we 20 nechche moluq chong hoylidin ötüp, meschitning ichige kirdi. Yü jéngshéng qatarliqlar héytgah jamesining asasiy ehwali, tarixiy özgirishi toghrisidiki tonushturushni estayidil anglighandin kéyin, diniy paaliyetlerning qanat yaydurulush ehwalini tepsiliy igilidi hem qeshqer wilayitidiki diniy zatlar wekilliri bilen paranglashti.

yü jéngshéng wetenperwer diniy zatlarning shinjang, bolupmu jenubiy shinjangning muqimliqini qoghdash xizmitige qoshqan muhim töhpisini toluq mueyyenleshtürdi. U: din xizmiti shinjangda ijtimaiy muqimliq we ebediy eminlikke munasiwetlik chong ish. Wetenperwer diniy zatlarni dadil söz qilish we ipade bildürüsh, toghra étiqadni ewj aldurush, esebiylikke qarshi turush, milletler ittipaqliqi, dinlar inaqliqini ilgiri sürüsh jehette ülgilik, bashlamchiliq rolini jari qildurushqa paal yéteklesh kérek, dédi. Diniy zatlar: diniy ishlarni sotsiyalizm jemiyitige uyghunlashturushni paal ilgiri sürüp, tiriship ‹‹beshte yaxshi›› diniy zatlardin bolup, ‹‹beshte yaxshi›› diniy sorun berpa qilip, hazirqi xatirjem ijtimaiy weziyetni qedirlep, milletler ittipaqliqini köz qarichuqimizni asrighandek asraymiz, déyishti.

qeshqer iqtisadiy tereqqiyat rayoni shénjén kesipler rayoni shénjén sheherchisining shinjangning nishanliq yardem bérishidiki belge xaraktérlik qurulushi bolup, kesipler rayoni ichige jaylashqan qeshqer "jenbo" éléktiron pen – téxnika cheklik shirkiti kesipler boyiche shinjanggha nishanliq yardem bérishning wekili. Yü jéngshéng bu yerge kélip xizmetlerni közdin kechürüp, kesipler rayonining omumiy qurulush ehwali we karxanining ishlepchiqirish, tijaret ehwali toghrisidiki tonushturushini anglidi.

éléktiron mehsulatlirini ishlepchiqirish liniyeside, terbiyelengen déhqanlar pishqan kesip ishchilirigha aylanghan bolup, qurashturush, tekshürüsh bilen aldirash idi. Yü jéngshéng neq meydandiki ishchilar bilen semimiy paranglashti, ularning terbiyeleshke qatnishish ehwali, ish ornigha chiqip ishlesh, aile kirimi qatarliq konkrét ehwallarni tepsiliy igilidi. Yü jéngshéng karxanilarni shinjangdin ibaret bu yéngidin bash kötürgen meblegh sélish bazirida yiltiz tartishqa, shinjangning özgiche ewzellikini qézishqa mahir bolup, tetqiq qilish, meblegh sélishni kücheytish, dölet ichi chong bazirigha yüzlinip, xelqara bazarni nishanlap, üzlüksiz tereqqiy qilip zoriyishqa righbetlendürdi.

yü jéngshéng yene jenubiy shinjang herbiy rayonigha bérip hal soridi, her millet komandir – jengchiliri bilen birmu bir qol éliship körüshti hem birlikte xatire süretke chüshti.

yü jéngshéng qizghin alqish sadaliri ichide söz qilip mundaq dédi: jenubiy shinjang élimizning gherbiy shimal chégrasidiki muhim mudapie istihkami, gherbke échiwétishtiki aldinqi sep, shundaqla bölgünchilikke qarshi turush kürishining asasiy jeng meydani. Jenubiy shinjangda turushluq qisimlar partiyening yéngi weziyettiki armiyeni qudret tapquzush nishanini zich chöridep, burchini üstige élishni kücheytip, burchni ada qilish iqtidarini östürüshi, jenubiy shinjangning ijtimaiy muqimliqi we ebediy eminlikini ishqa ashurushni küchlük tayanchqa ige qilishqa kapaletlik qilishi kérek.

aptonom rayon we bingtüen rehberliridin xen yung, shawket imin hal sorashqa ayrim-ayrim hemrah boldi.

 

Kéyinkisi
图片新闻