كورېيە لىخۇا قىزلار داشۆسىنىڭ بىر تۈرلۈك يېڭى تەتقىقاتىدا بايقىلىشىچە، دائىم چىش چوتكىلاش دالانچە تىترەش ۋە يۈرەك زەئىپلىشىش خەۋپىنى ئۈنۈملۈك تۆۋەنلىتىدىكەن. تەتقىقاتچىلار «كورېيە دۆلەتلىك داۋالىنىش سۇغۇرتىسى سىستېمىسى»دىن 40 ياشتىن 79 ياشقىچە بولغان 161 مىڭ نەپەر سىناققا قاتناشقۇچىنى تاللاپ چىققان، ئۇلاردا دالانچە تىترەش ياكى يۈرەك زەئىپلىشىش كېسەللىك تارىخى يوق ئىكەن. 10 يېرىم يىللىق ئوتتۇراھال دەرىجىدىكى ئىز قوغلاش مەزگىلىدە 4911 ئادەم (%3) دالانچە تىترەش كېسىلىگە گىرىپتار بولغان، 7971 ئادەم (%4.9) يۈرەك زەئىپلىشىش كېسىلىگە گىرىپتار بولغان. سانلىق مەلۇماتلارنى ئانالىز قىلىش نەتىجىسىدە كۆرسىتىلىشىچە، ھەر كۈنى ئۈچ قېتىم ياكى ئۇنىڭدىن ئارتۇق چىش چوتكىلىغانلارنىڭ دالانچە تىترەش كېسىلىگە گىرىپتار بولۇش خەۋپى %10، يۈرەك زەئىپلىشىش كېسىلىگە گىرىپتار بولۇش خەۋپى %12 تۆۋەنلەيدىكەن.

تەتقىقاتچىلارنىڭ بىلدۈرۈشىچە ئېغىز بوشلۇقى تازىلىقىنىڭ ياخشى بولماسلىقى باكتېرىيەلەرنىڭ قاندا كۆپىيىشىنى كەلتۈرۈپ چىقىرىپ بەدەندە ياللۇغلىنىشنى كەلتۈرۈپ چىقىرىدىكەن، بۇ دالانچە تىترەش ۋە يۈرەك زەئىپلىشىش خەۋپىنى ئاشۇرۇۋېتىدىكەن. دائىم چىش چوتكىلاش چىش مىلىكى ئاستىدىكى بىيولوگىيەلىك پەردىدىكى باكتېرىيەلەرنى ئازايتىپ، ئۇلارنىڭ قانغا يۆتكىلىشىنىڭ ئالدىنى ئالىدىكەن.